Psalms 108
1O Moroa. Labalak it kis saga ram. Anak pixan tu, la ana emi asu minu mi lorooro axap tarak. Labalak, una aus! 2Loxontaaleng tarak mi ligita, muna gagas. Nia anaba sak aus laxangking at labarakoxot mi loxompixan. 3O Leeme Silok. Ana tong avukat tu kantubu at larabung mixin axap, la abak pixan emi asu minu kantubu at limixin; 4mila labalamu lexen taram i silok aleng tinotno, la i umsu bok to mavana at laxalibet; la luruturun taram i suxuna axap lamavangkap. 5O Moroa, una lox asuusu lolos taram tovana at lamvangkap, la una lox asuusu bok lisisixam taram to at lengkot axap at na lavatbung menemen.6Una rebeng nama mi lolos taram la una lox asepsu nama basinge lavamunepen atnama; la una ronga res at lisingising tarak, kusu una lox asu ka limixin taram, mo u balamu nedi, basinge lavamunepen atdi. 7To at loogu xaala ren Moroa ga tong i xeretna, “Nia anaba sak tup mi lavamunepen tarak la ana sak epeseves di basinge lenep kanga rak. Nia anabapdo epes nom lemenemen Sekem ti limixin tarak, la anapdo episa mo lasa ro Sukot tidi. 8Nia a ruuna mo lenep Gileat, la Manase; la lenep Epraem bok ni lavatkiam tarak i tu katling ia at leesep. La lenep Juda ik lox asuusu lubung amgomgo ri limixin tarak. 9Ketla lenep Moab naba lok ngan lavattingtigon gosogos panga; nia anaba lu mi luxompanga vatpas tarak uto at lenep Edom, ngan loklok katling do nia a ruuna i. Limixin me Pilistia diga lok do dinaba sak tup minia, ketla digoxo epovo.”
10O Moroa, nege bamgo ria uto at lenep silok Edom? Nege ba lok tooro ia xusu ana sak tup midi ro at lemenemen silok atdi, mo diga bos kangkan i mi larangas uat. 11Kereva, ura sok sisixe xepe rino vam nema? Kereva, ixo epovo bok ba xusu una vas su eburu bok ba mi limixin esep atnema? 12Una lok tooro nema kusu mana sep lavamunepen, atla lolos at limixin noxo lok epovo tavanga.
13Do ne Moroa na ru eburu minema, manaba sak tup mi lavamunepen, neni naba sev asubu di.
Copyright information for
MMX